Garhwali Poems by Payash Pokhara Part-1

Critical and Chronological History of Modern Garhwali (Asian) Poetry –-308

                    Literature Historian:  Bhishma Kukreti

     आदिम
         ******

मनख्यूं की घिमसांण मा कख हरचणु च आदिम ।
यखुळ्या-यखुलि अफु थैं अफि ख्वजणु च
आदिम ॥

गौं-गळ्या मा त्वैथै फुलफुल देळि किळै
दिखेण ।
फुलदेई की कुंगळि जैड़्यूं थै उपड़णु च
आदिम ॥

अब चखुलों का च्युचांण फर भि चिरड़ै जांद ।
तबि त कन्दुड़ु अपणा अंगुळा क्वचणु च आदिम ॥

बाघ बांदर सुंगर चौका खळ्याण म छन रिटणा ।
अपणा यूं दगड़्यौं दगड़ क्य ब्वलणु च आदिम ॥

अफु से जादा चंट चालाक कैथै च नि चिताणु ।
तबि त दुख दलेदरा का थौला ब्वकणु च
आदिम ॥

हैंसि खुसि घड़ेक अपणि धणैत लगै ले
'पयाश' ।
कन ह्यळि गडि गडिक रुंदरौ थै द्यखणु च
आदिम ॥

@ पयाश पोखड़ा ॥

त्वै उज्यळा दीणा का बाना
***********************

उमाळ जिकुड़ि कु सुदि त नि
खत्याई होलु ।
कुछ न कुछ वींल त्वैथैं कन नि
बताई होलु ॥

रामि बौराणि सि वा जरुर पुंगड़ि
ग्वडणि रै होलि।
तबि त तिल अपरि कपळि रंगुड़ु
लगाई होलु ॥

इन लगद कि तिल अपणि खुटि
जादै अळगै दीं ।
तबि त तिल सबसे पैलि यो सरग
लिमाई होलु ॥

आंख्यूं मा तेरि लाज सरम त
लुकईं त रै होलि ।
तबि त से झुठन्दरा ल अपणु मुक
फरकाई होलु ॥

सर्या जिदंगि चखुलों का फंखुड़ु
छिनरणा रै जो।
अब क्य जो बुढैण दां क्वी फत्यलु
बचाई होलु ॥

'पयाश' नि बोल कि य आग वीकीं
पिळचईं होलि ।
त्वै उज्यळा दीणा का बाना जिकुड़ु
जळाई होलु ॥

@पयाश पोखड़ा ॥

बाटा, जो आज भि त्वै जग्वाळ कना छन
*************-*********************

ढुंगा गारौं थैं किटदा-किटदा बाटा ।
ठण्डु मठु कै हिटदा-हिटदा बाटा ॥

मोळ-माटल भलिकै लप्वण्यां बाटा ।
चुना-कम्यड़ल छक्वै छप्वण्यां बाटा ॥

द्यप्तों मा दुर्बा आसीस मंगदा बाटा ।
माद्यौ-मंदिर की देळि भ्यटदा बाटा ॥

पाटि-ब्वळ्ख्या बस्ता ब्वक्दा बाटा । इसक्वळ्या छ्वारों थैं ट्वक्दा बाटा ॥

धर्या-धार उचा-निसा डांडो का बाटा ।
नवळि पंद्यरिम अग्यर्या भांडो का बाटा ॥

घास लखुड़ु की बिठिगि बिसौण्यां बाटा ।
ख्वींडी दाथि थमळि थैं पळ्यौण्यां बाटा॥

दगड़्यों को दगुड़ु ख्वज्दा-ख्वज्दा बाटा।
सौंजड़्यों का दगड़ रुज्दा-रुज्दा बाटा॥

तेरि खुदेड़ खुद का समळ्यौण्यां बाटा।
बिसरीं छुवीं बातु का बिसरौण्यां बाटा॥

पुरणा बाटों जनै वी नज़र पुर्यांदा बाटा ।
खाळा-म्याळों मा वी खिर्तू उर्यांदा बाटा॥

औडळ बथौं मा भलिकै भतड़ेदां बाटा ।
हैंस्दा-ख्यल्दा कुरचेन्दा पतड़ेदां बाटा ॥

कमर टुटीं डुण्डि सि उकळि का बाटा।
घुण्डों की खपचईं सि उंधरि का बाटा॥

थक्यां-थक्यां म्वरण्यां-म्वरण्या बाटा।
चिगैं चिंग्वात चिरण्यां-चिरण्यां बाटा॥

पैटगीं इखरु सांस ल्हिदां-ल्हिदां बाटा।
बैठगीं रस्तम तमखू पींदा-पींदा बाटा ॥

डुण्डा ब्यगड़ा तिर्वण्यां मर्वण्यां बाटा।
मुर्क्या भड़क्यां चिर्यां चिर्वण्यां बाटा ॥

खैड़-कत्यार छील-छींजा उकरदा बाटा।
ज्यूंदा-म्वर्यां थैं कांधिम लिखरदा बाटा॥

कै दगड़ भि आणि न जाणि करदा बाटा।
यकुंलास मा भि यखुलि नि डरदा बाटा॥

अब त तुमरा चौकम बिसयां छन बाटा। द्वरढक्कि देखिकि खिसयां छन बाटा॥

दुबट्टा तिबट्टा अर चौबट्टा बाटा ।
झणि कनै लिजाला इ घंघत्वळ्या बाटा॥

घूम-घामिक ये रिटदा-रिटदा बाटा ।
कै गौं जाणा ह्वाला ये हिटदा बाटा ॥

ठ्यलेंदा रस्ता अर सरकदा बाटा ।
द्यख्दै-द्यख्दा सर्र-सर हरचदा बाटा ॥

रोज़ तेरि लब्बी लपग्यूं थैं गैंणदा बाटा ।
रोज़ अपणि जिकुड़ि थैं खैंणदा बाटा ॥

हां, तुमरि जग्वाळ करदा-करदा बाटा ।
से गीं अपणि निंद मरदा-मरदा बाटा ॥

@पयाश पोखड़ा ॥

काश........!!!
*************

मि वल छाल अर तू पल छाल नि हूदुं ।
काश ! हमरा बीचम यो पहाड़ नि हूदुं ॥

हमत तुमथैं सानि कैकि भि न्युति दींदा ।
काश ! आंख्यूं बीचम यो पहाड़ नि हूदुं ॥

जिंदगि मा सदनि मौत थैं ख्वजणा रवां ।
काश ! मौत कु मैती यो पहाड़ नि हूदुं ॥

हमरा गिच्च फर तुमरि छुवीं नि आंदी ।
काश ! हुंग्रा पुर्याणु यो पहाड़ नि हूदुं ॥

मि अपणि लगांदु त तुमरि भि सुणुदु ।
काश ! रुसयूं-खिसयूं यो पहाड़ नि हूदुं॥

खौळ्यां सि चौका-खल्याणा का बीच मा।
काश ! चौंफ्ळा ख्यळ्दु यो पहाड़ नि हूदुं॥

'पयाश' दगड़ तुमरा गौं हम भि आंदा ।
काश ! मुख ऐथर खड़ु यो पहाड़ नि हूदुं॥

@ पयाश पोखड़ा ।

"कुछ त बोलि जैई"
****************

आख्यूं-आंख्यूं मा कबरि-कबरि कुछ त बोलि जैई ।
छुयूं-छुयूं मा अपणि गठ्यईं गेड़ खळ्ळ खोलि जैई ॥

सच्चि-झूटी भलि-बुरि सबि छुवीं म्यारा बांठ धैरिगे ।
आंदा-जांदा कबरि अपणि खुचिलि भि टटोळि जैई ॥

जौं छुवीं सुणि-सुणिक दुख्यरि जिकुड़ि होलि कैकि ।
सच्ची भि होलि ता, बोलि ना, प्वारम धोळि जैई ॥

भ्यलि कि डैळि सि मिठ्ठि होलि तेरि छुयांळ गैळि ।
पर घुघुति कफु हिंलास का दगड़ा दगड़ि
तोलि जैई ॥

कभि न कभि क्वी, कन नि आलु , द्वार उगाड़ि राखि ।
अपणि मयळ्दु माया कि मंदिरि कूणि मा बिटोळि जैई ॥

बिरणा ह्वैकि भि अपणा आंसु किळै लुकंया छन ।
'पयाश' की खालि खुचिलि मा द्वि बूंद फोळि जैई ॥

@पयाश पोखड़ा ॥

"वो क्वी हौरि ह्वाला"
********************

हे बगत ! मि सड़म हिट नि सकदु
त्वै बरोबर ।
वो क्वी हैरि ह्वाला जु त्वै अधमिरा
बाटों मा छौंपला ॥

हे डौंड्यां ! मि द्यप्ता नि ह्वै सकुदु
त्वै बरोबर ।
वो क्वी हौरि ह्वाला जु द्यप्तुळ मा
द्यप्ता सि कौंपला ॥

हे ढुंगेर ! मि नि घण्टे सकुदु डाळि
त्वै बरोबर ।
वो क्वी हौरि ह्वाला जु लंगलंगि
भौक्यूं थैं लौंपला ॥

हे मायादार ! मि नि ह्वै सकुदु मयळ्दु
त्वै बरोबर ।
वो क्वी हौरि ह्वाला जु जिकुड़ि थैं
'पयाश' म सौंपला ॥

@पयाश पोखड़ा ॥

आजादी......? Kavita

---------

पाड़ बटैकि आजादी ....?
पाड़ भ्यटैकि आ जादी ॥

पाड़ छोड़िक आजादी ....?
पाड़ बौड़िक आ जादी ॥

पाड़ मुक फरकाणा कि आजादी ....?
पाड़ कु मुक द्यखणा कु आ जादी ॥

पाड़ जनि छैं च सिनै आजादी ....?
पाड़ कि ज्वनि पाड़ जनै आ जादी ॥

@पयाश पोखड़ा ॥

जो सदनि हैंका कि कूड़ि-पुंगड़ि थैं हत्याणा रैं

---

जो सदनि हैंका कि कूड़ि-पुंगड़ि थैं हत्याणा रैं ।
वो भग्यान अफु खुण अफि खड्वळु खत्याणा रैं ॥

मुण्ड नवै, धुपणु दिवै, करणा रैं डौण्ड्या का ठाउ मा ।
पर वो द्यप्ता पुजै मा भि सदनि अपणो थैं
घत्याणा रैं ॥

अपणा-पर्यो फर प्वणि भारी बिपत देखि-
सुणिकि भि ।
छपछिपी प्वाड़ जिकुड़ि मा जौंकि वो पीठ थमथ्याणा रैं ॥

गुर्रौ अपणु कांचळ निखोळिक अफार वे
द्वळणा बैठ्यूं चा ।
अर ये लकीरा का फक़ीर कोरी कांचळ थथ्याणा रैं ॥

मीनत, मजूरि कैकि जाड़ा बैठ्यां लोग टुक्कू पौंछिगीं ।
ये बड़आदिम बिरणि पीठि मा अफुथैं पत्याणा रैं ॥

छांछ छोळि-छाळिक वो गुन्दकि नौणि कि घूळि गैन ।
ये कपळि फर रंगुड़ु लपोड़िक भाग थैं लत्याणा रैं ॥

बाटा बिरड़ा छाया जु सुबेर, रुम्कां घार बौड़ जाला ।
यो थारम दे-देकि "पयाश" पापी पराण बुथ्याणा रैं ॥

@पयाश पोखड़ा ।

"वो"

*******

घुट्ट-घुट्ट भडूळ्यं मा 'वो'
इन ब्वना छन ।
कि उंका हाल भि ऐन-सैन
मि जना छन ॥

उळ्यरु पराण, हरचीं जिकुड़ि,
ख्वजदेर आंखि ।
झणि कैका खयालु मा 'वो'
कै जनै ह्यना छन ॥

बल मुखड़ि मनखि कि भौत
कुछ बतै दींद ।
तबि त 'वो' करळि नज़र इनै-
उनै धना छन ॥

दिनम पोतळ, राति जोगण अब
मेरि दगड़्या ह्वैगीं ।
पर जून-गैंणौं दगड़ अब 'वो'
क्य कना छन ॥

घुंघट्या की ढण्डी से गैरी
मेरि जिकुड़ि चा ।
'वो' बल भक्कम फाळ मरणा कु
सांसु कना छन ॥

हे घुघती, कफू, हिंलास आ
म्यारा खळ्याण मा ।
तुमरि बोलि सुणि लगद जन
'वो' ब्वना छन ॥

भारी चलेतर, चबौड़्या, चुकलेर
ह्वै ग्या हवा भि ।
तबि त 'वो' बन्द भितरों का
द्वार ख्वना छन ॥

म्यारा खुदेड़ गीत, गज़ल थैं
पैड़ि-सुणि की ।
'वो' अपणि मयल्दु माया खुण
"पयाश" ब्वना छन ॥

@पयाश पोखड़ा ।

"ढुगौं का ठप्पकौण्यां"
********************

कत्गा रौला-बौला त उनि छप्पत्वळै कि
तैर ग्या वो ।
पर हम खुणै त ढुगौं का ठप ठप्पकौण्यां
धैर ग्या वो ॥

जाणिकि भि अजाण बणिकै वैका काख-
धाड़ बैठु मि ।
द लाटु अपणि जगा छोडिकि सर्र फुण्डै
सैर ग्या वो ॥

क्युंकळि, किसळि, कादै अर जिकुड़ि मा
भटुळि सि लगैकि ।
आंख्यूं-आंख्यूं मा झणि क्य-क्या सानि
कैर ग्या वो ॥

तिसळा पराणा की छम्वट्या तीस भि
तिसळि रै ग्याइ ।
म्यारा रुफ़ड़ांदा सरैल देखिकि जणि
डैर ग्या वो ॥

दुन्यां का समणि गिच्चु उफरणा की
हिकमत नि छे ।
ब्वन-बच्याणा कु कभि भितर त कभि
भैर ग्या वो ॥

दीनद्वफरि का चुड़ापट्टि का घाम मा
ठण्डू छैल सि ।
जांदा-जांदा अचाणचक "पयाश" खुणै
ठैर ग्या वो ॥

पर हम खुणै त ढुगौं का ठप ठप्पकौण्यां
धैर ग्या वो ॥

@पयाश पोखड़ा ।

"जिकुड़ि का मोर-संगाड़"
**********************

इत्गा भि यखुल्या-यखुलि कभि नि राया,
जिकुड़ि का मोर-संगाड़ ।
कभि त क्वी,संगुळु बजालु,तरसणा छाया,
जिकुड़ि का मोर-संगाड़ ॥

द ब्वाला, अब कैमा लगाणै अपणि,
खैरि-बिपदा, सुख-दुख ।
अब त गौं मा भि कैका नि उगड़्यां छाया,
जिकुड़ि का मोर-संगाड़ ॥

अपणु-पर्याअ, दाइ-दुसमन, वाडा सरै
अर उज्याड़ खवै ।
सर्या रुड़ी-बसगाळ भलिकै सैड़िगे छाया,
जिकुड़ि का मोर-संगाड़ ॥

पल ख्वाळा का बूथा दाजि ब्वना छाया,
अपणा नाती-नतण्यूं मा ।
वे जमन मा दिन-रात खुल्यां रैंदा छाया,
जिकुड़ि का मोर-संगाड़ ॥

एक जमनु इन भि अयूं च अचकाळ,
म्यार गौं का वार-प्वार ।
भिचोळि-भिचोळिक भि नि खोलि पाया,
जिकुड़ि का मोर-संगाड़ ॥

मिल त अपणि छुवीं-बत्था सदनि,
दिल का भित्नै लुकाणु रौं ।
पर दिवल्युं का भि कच्चा कंदुड़ छाया,
जिकुड़ि का मोर-संगाड़ ॥

ल्हेलु भि त कनकै ल्हेलु अपणि
जागा-जमीनि की फ़रद ।
घूसखवा पट्वर्री का पट बन्द कर्यां छाया,
जिकुड़ि का मोर-संगाड़ ॥

कोठि,बग्लां, कार, फून हौरि झणि
क्य-क्या झमकयूं चा ।
फेरि भि खन्द्वार सि किळै दिखेणा छाया,
जिकुड़ि का मोर-संगाड़ ॥

कभि न कभि, क्वी न क्वी, कन नि आलु
म्यारा भि ध्वार-धरम ।
तुमरा भर्वंसा "पयाश" का ख्वल्यां छाया,
जिकुड़ि का मोर-संगाड़ ॥

@ पयाश पोखड़ा ।

हम भि कै जमन"
****************

बरखा का दीड़ों मा भिज्दा छाया,
हम भि कै जमन ।
सौणा का स्वीणों मा रुज्दा छाया,
हम भि कै जमन ॥

सर्र कुएड़ि सि लौकेन्दि छे,
जब-जब जिकुड़ि मा ।
तुमरा सौं तुमथैं त ख्वज्दा छाया,
हम भि कै जमन ॥

आंखि-आंख्यूं मा मायादार,
छुवीं-बत्था बिंगै कि ।
छुयांळ आंख्यूं कि छुवीं लुच्छ्दा छाया,
हम भि कै जमन ॥

पोतळ सि कभि ईं धार वोर त,
कभि वीं धार पोर ।
झणि किळै तुमरा पैथर भज्दा छाया,
हम भि कै जमन ॥

बुलबुल पलोसिक अर कैदि,
स्युदिं-पाटी कटोरिक ।
तुमर बान बैख जन सज्दा छाया,
हम भि कै जमन ॥

@पयाश पोखड़ा ।

अस्तित्व की विडम्बना" फर द्वि गढ़वळि शेर ----

बूंद बणिकै चुप्प बैठ्यूं रौ,
आंख्यूं का कुण्यूं मा ।
भैर ढळक्येळि त आंसु सि,
हर्चि जैलु गळ्वड़्यूं मा ॥ (१)

ब्याळि तक जो मवस्यूं का
मुच्छ्यळा मुंजाणा रैं ।
लोग उंथैं आज धुपणूं
दीणा कु खुज्याणा रैं ॥ (२)

@पयाश पोखड़ा ।

नि दिखेन्दी"
************

क्वी घिंडुड़ि न घुघुति,
सटुलि नि दिखेन्दी।
चौका तिर्वळि अब क्वी,
चखुलि नि दिखेन्दी ॥

क्वी खाळा न म्याळा,
कौथिग नि उरेन्दा ।
लाल जल्यबि दगड़ क्वी,
बंसुळि नि दिखेन्दी ॥

सरम ल्याज़ का दगड़ा,
सूनू चन्दी भि हरचा ।
दादी का गाळुन्द अब क्वी,
हंसुळि नि दिखेन्दी ॥

मासा, चौमासा मा हैरि-
मौळ्यार धौ दिखेन्दा ।
पर कखड़ि-ग्वदड़ि की,
लगुलि नि दिखेन्दी ॥

पैड़ि-लेखि गैन लोग,
अब गळद्यवा नि राया ।
गौं मा कैकि डाळा लगीं,
झगुलि नि दिखेन्दी ॥

सैड़िकि कुयड़ु-कुयड़ु सि,
ह्वै ग्याइ वा डाळि ।
झपन्याळ पात सि वींकी,
भिंटुलि नि दिखेन्दी ॥

जनै द्याखा "पयाश" उनै,
जिकुड़्यूं का चोर छन ।
क्वी पराज़ न खुद,
भटुळि नि दिखेन्दी ॥

@पयाश पोखड़ा ।

झूटु च आदिम"
***************

सेरेक सच्चु अर पाथेक झूटु च आदिम।
तबि त थांता मसकुटौल कूटु च आदिम॥

जमादरि कबि त थ्वकदरि सि दिख्याई।
तबि त कत्गौले भलिकै लूटु च आदिम॥

ल्वैखाळ ह्वैकि ल्वै का छंछ्वड़ा लगैन।
तबि त कत्गै दा फट्ट फूटु च आदिम॥

सदनि लूण मरचा की मुट भ्वरीं राखा।
तबि त सबुल भूटंण सि भूटु च आदिम॥

तकणा तकण हुईं राया दिन राता की।
तबि त सुख्यूं क्याडु सि टूटु च आदिम॥

कबि गिच्चा बटैकि भला बाग नि छूटा।
तबि त कड़ु गिळै सि घूटु च आदिम ॥

सदनि दपकाणु राया अपणा पर्यो थैं ।
तबि त बिछी गुर्रो सि चूटु च आदिम ॥

आंखि मनिख्यूं थैं ख्वज्याणि च "पयाश"।
तबि त अदम्यूं दगड़ छूटु च आदिम ॥

@ पयाश पोखड़ा ।

Copyright @ Bhishma Kukreti Mumbai; 2016

Critical and Chronological History of Asian Modern Garhwali Songs,  Poets   ; Critical and Chronological History of Modern Garhwali Verses,  Poets ; Critical and Chronological History of Asian Modern Poetries,  Poets  ; Poems Contemporary Poetries,  Poets  ; Contemporary Poetries from Garhwal; Development of Modern Garhwali Verses; Poems  ; Critical and Chronological History of South Asian    Modern Garhwali Verses  ; Modern Poetries ,  Poets  ; Contemporary Poetries,  Poets  ; Contemporary Poetries Poems  from Pauri Garhwal; Modern Garhwali Songs; Modern Garhwali Verses  ; Poems,  Poets   ; Modern Poetries  ; Contemporary Poetries  ; Contemporary Poetries from Chamoli Garhwal  ; Critical and Chronological History of Asian Modern Garhwali Verses ; Modern Garhwali Verses,  Poets   ; Poems,  Poets  ; Critical and Chronological History of Asian  Modern Poetries; Contemporary Poetries , Poems Poetries from Rudraprayag Garhwal Asia,  Poets   ; Modern Garhwali Songs,  Poets    ; Critical and Chronological History of Asian Modern Garhwali Verses  ; Modern Poetries  ; Contemporary Poetries,  Poets   ; Contemporary Poetries from Tehri Garhwal; Asia  ; Poems  ;  Inspirational and Modern Garhwali Verses ; Asian Modern Garhwali Verses  ; Modern Poetries; Contemporary Poetries; Contemporary Poetries from Uttarkashi Garhwal  ;  Modern Garhwali Songs; Modern Garhwali Verses  ; Poems  ; Asian Modern Poetries  ; Critical and Chronological History of Asian Poems  ; Asian Contemporary Poetries; Contemporary Poetries Poems from Dehradun Garhwal; Famous Asian Poets  ;  Famous South Asian Poet ; Famous SAARC Countries Poet  ; Critical and Chronological History of Famous Asian Poets of Modern Time  ;

-

पौड़ी गढ़वाल, उत्तराखंड  से गढ़वाली , कविता ; चमोली  गढ़वाल, उत्तराखंड  से गढ़वाली पद्य  , कविता ; रुद्रप्रयाग गढ़वाल, उत्तराखंड  से गढ़वाली पद्य  , कविता ;टिहरी गढ़वाल, उत्तराखंड  से गढ़वाली पद्य  , कविता ;उत्तरकाशी गढ़वाल, उत्तराखंड  से गढ़वाली पद्य  , कविता ; देहरादून गढ़वाल, उत्तराखंड  से गढ़वाली पद्य  , कविता ;