जब भुंदरा बौ कुत्ता खरीदणो देहरादून गे

Very Short Garhwali Stories

                     जब भुंदरा बौ कुत्ता खरीदणो देहरादून गे  

(  गढ़वाली लघुकथा श्रृंखला -5 , Garhwali Very Short Stories -5  ) 
                         कथा रूपांतर    -- भीष्म कुकरेती 

भुंदरा बौ तै इन होशियार कुत्ता की जरूरत छे जु कुत्ता गूणी बांदरुं जाणो बाद कि भूको अपितु गूणी बांदर आंदि भुकण शुरू ह्वे जावो।  भुंदरा बौ तै इन कुत्ता चयेणु छौ जु उज्याड़खव्वा बल्दाक दगुड़ नि द्यावो बल्कणम इन बल्द तैं उज्याड़ नि खाण द्यावो। 

कैन बताइ बल क्लाइमेंटाउन देहरादून मा रिटायर्ड मेजर फलण सिंगम इन कुत्ता च जु जग्वळि इ नि करदो अपितु मनिखों तरां बुल्दो बि च। 

भुंदरा बौ मेजर (रि ) फलण सिंग तैं मिलणो देहरादून पौंची गे। 

मेजर साबन कुत्ता दिखाई। 

भुंदरा बौन मेजर साब सणि पूछ - मेजर साब बल मीन सूण बल यु कुत्ता मनिखों तरां बुल्दु बि च बल ?

मेजर साब - तुमि देख ल्यावो।  हे टॉमी जरा यूँ तैं बतादि तू कु छे ?

कुत्ता - श्रीमती जी म्यार कुल बुलडॉग फेमिली को च।  मीन बंगलादेश की लड़ाई नि लड़ी पर म्यार बुबा जीन अर मेरी ब्वे द्वी बंगलादेश की लड़ाई मा भारतीय सेना मा दुसमन सुँघ्वा डॉग बटालियन मा ब्रिगेडियर अर मेजर छया।  मि बि रिटायर हूण से पैल भारतीय सेना मा कम्पनी कमांडर छौ अर मीन पाकिस्तान बॉर्डर पर सैकड़ों आतंकबादी पकड़वैन।  मि तै कथगा ही वीर चक्र अर शौर्य चक्र मिल्यां छन।  आज बि अजित डोभाल तै जब बि उत्तम कुत्ता चयेंद तो डोभाल जी मेरी सहायता अवश्य लीन्दन।  

भुंदरा बौ - अरे वाह क्या शानदार, जानदार , झालरदार कुत्ता च यु ! मेजर साब कीमत ब्वालो।  

मेजर फलण सिंग - पचास रुपया। 

भुंदरा बौ (खौंळेक )- हैं इतना शानदार , जानदार , झालरदार कुत्ता की कीमत केवल पचास रुपया ?

मेजर फलण सिंग - हाँ उन तो यु कुकुरो लौड़ शानदार , जानदार , झालरदार डौग च पर महाझूठ कुत्ता च। पर  एक बि शब्द सच नि बुल्दो   

27 /11 /2015 Copyright @ Bhishma Kukreti 

Garhwali Stories; Very Short Garhwali stories from Garhwal; Very Short Garhwali stories from Garhwal, Uttarakhand; Very Short Garhwali stories from Garhwal, Uttarakhand, Himalaya; Very Short Garhwali stories from Garhwal, Uttarakhand, North India ; Very Short Garhwali stories from Garhwal, Uttarakhand, South Asia;