Best Harmless Garhwali Literature Humor , Garhwali Literature Comedy Skits , Garhwali Literature Satire, Garhwali Wit Literature , Garhwali Sarcasm Literature , Garhwali Skits Literature , Garhwali Vyangya , Garhwali Hasya
चबोड़्या स्किट संकलन ::: भीष्म कुकरेती
[कैरा काकाक पैथर बोर्ड लग्युं च -गढ़वाल सूचना केंद्र . पूछताछ , सबि सूचना मीललि। घ्याळ दाक प्रवेश ]
घ्याळ दा -शुभ प्रभात !
कैरा काका -शुभ प्रभात !
घ्याळ दा -शुभ प्रभात !
कैरा काका -अच्छा ?
घ्याळ दा -हाँ ?
कैरा काका -हाँ इखम सब सूचना मिल्दी।
घ्याळ दा -अच्छा मि तै सूचना चयेणी च।
कैरा काका -हाँ क्या चैणी छन।
घ्याळ दा -पता नी च। अच्छा चलो तुमम क्या च ?
कैरा काका -मतबल ?
घ्याळ दा -मतलब तुमम क्या क्या सूचना छन ?
कैरा काका -सब तरां की।
घ्याळ दा -जन कि ?
कैरा काका -जन कि बांज -बुरांस की औसतन आयु।
घ्याळ दा -औ मि तै पता इ नि छौ कि बांज -बुरांस की औसतन आयु हूंद।
कैरा काका -हाँ हूंद च।
घ्याळ दा -औ। कुछ हौर सूचना बि च ?
कैरा काका -हाँ छैं छन। पर तुम तै प्रश्न पुछण पोड़ल।
घ्याळ दा -अर तब आप जबाब देल्या ?
कैरा काका -हाँ।
घ्याळ दा -अच्छा उत्तराखंड का क्या छन ?
कैरा काका -या तो क्वी सूचना नि ह्वे। कुछ हौर सवाल पूछ।
घ्याळ दा -तो गढ़वाल का क्या हाल छन ?
कैरा काका -क्या हाल छन मतबल ?
घ्याळ दा -मतलब गढ़वाल की तब्यत ठीक थाक च या ?
कैरा काका -पर गढ़वाल की तब्यत तो कई तरह से जाँचे जांद।
घ्याळ दा -तो एक तरह से इ बतै द्यावो।
कैरा काका -हाँ पर कै तरह से ?
घ्याळ दा -देखो जी सूचना आपन दीण अर प्रश्न में से करणा छंवां ?
कैरा काका -हाँ पर क्यांक सूचना दीण ?
घ्याळ दा -ब्वाल च ना गढ़वाल का क्या हाल छन ?
कैरा काका[गुस्सा मा अर टरकाणो बान ] -बुरा हाल छन।
घ्याळ दा -को च जुम्मेवार ?
कैरा काका -क्यांक जुम्मेबार ?
घ्याळ दा -बुरा हालका जुम्मेवार ?
कैरा काका -मि त नि छौं।
घ्याळ दा -तो मि छौं ?
कैरा काका -आप अपने को ही पूछो।
घ्याळ दा -पर जबाब तो आपण दीण ना ?
कैरा काका -हाँ पर कामक सवाल हो तो जबाब द्यूं ना ?
घ्याळ दा -गढ़वाल की हालत की सूचना कामक सूचना नी च ?
कैरा काका -छैं च पर मथि वाळ इन सूचना ये सूचना केंद्र तै नि दींदन।
घ्याळ दा -चलो ठीक च। हैंक सवाल करूँ ?
कैरा काका -हाँ पूछो।
घ्याळ दा -खुसी का राज ?
कैरा काका - ये प्रश्नक जबाब गुप्त बि च अर निषिद्ध बि च।
घ्याळ दा -पर आपम छै च ना ?
कैरा काका -हाँ छैं च पर निषिद्ध अर गुप्त च।
घ्याळ दा -अच्छा प्लीज मि तै बताओ कि ख़ुशी का राज क्या च ?
कैरा काका -छ तो गुप्त च -आप कैमा बोल देल्या तो ?
घ्याळ दा -मि कै तै नि बतौल।
कैरा काका -तो ख़ुशी का राज रहस्य च कि -
घ्याळ दा -हाँ बताओ।
कैरा काका -ठीक बतै इ दींदु कि -
घ्याळ दा -हाँ हाँ ब्वलो ना ?
कैरा काका -कभी भी प्रश्न ना पूछो।
18 /4/15 , Bhishma Kukreti , Mumbai India
*लेख की घटनाएँ , स्थान व नाम काल्पनिक हैं । लेख में कथाएँ , चरित्र , स्थान केवल व्यंग्य रचने हेतु उपयोग किये गए हैं।
Garhwali Vyangya , Garhwali Hasya, Garhwali skits; Garhwali short skits, Garhwali Comedy Skits, Humorous Skits in Garhwali, Wit Garhwali Skits
No comments:
Post a Comment
आपका बहुत बहुत धन्यवाद
Thanks for your comments