कॉंग्रेस की खज्यात अयीं च , वीं तैं क्या बीमारी लगीं ह्वेलि ?

 Best  Harmless Garhwali Humor  , Satire, Wit, Sarcasm , Garhwali Vyangya , Garhwali Hasya

                              कॉंग्रेस की खज्यात अयीं च , वीं तैं क्या बीमारी लगीं ह्वेलि ?

                                 चबोड़्या : भीष्म कुकरेती 

 मि कोशिश करदो कि कै बि तरे से राजनीतिक लोगुं पर कम से कम लेखुं।  कारण च कि आजौ लेख हैंक साल मजा नि दींदु।  अर बीसेक साल बाद तो समज मा बि नि आंद कि लेख किलै लिखे गे होलु।  म्यार 1985 का कथगा इ राजनीतिक लेख आज रेलीवेंट नि छन । 

पर बुल्दन बल मंगत्या त मंगण छुड़ण चाणु च पर दानी बुलणा छन कि मंगत्या नि राला तो हमकुण दानी कु ब्वालल ?  कॉंग्रेस , बजरंग दल , टीएमसी, लालू आदि का इन हाल छन कि मि तैं राजनीति पर लिखण इ  पड़द।

        अब एक पार्टी च कॉंग्रेस ज्वा अफु तैं 130 साल पुरण पार्टी बुल्दी।  या पार्टी रणनीति रणनीति का मामला मा दिवालिया ह्वे गे। 

              यूंन पैल गुजरात मा 2002 का बाद नरेंद्र मोदी तैं इथगा गाळी देन कि कॉंग्रेस कु नाम गुजरात मा पड़ि गे - हिंदु विरोधी पार्टी 

           सन 2013 मा जब भाजपान नरेंद्र मोदी तैं प्रधानमंत्री कंडिडेट घोषित कार तो सबि सेक्युलर पार्टी बुलण मिसे गेन कि अब अल्पसंख्यकों याने मुसलमानुं खैर नी च।  हौरुं उथगा नुकसान नि ह्वे पर कॉंग्रेस पर राष्ट्रीय स्तर पर एक तगमा लग बल कॉंग्रेस माने - हिंदु विरोधी पार्टी !

फिर जब कॉंग्रेस तकरीबन सफाचट ह्वे गे तो कॉंग्रेस का थिंक टैंक  दिमागी तौर पर  दिवालिया हि ह्वे गे। 

              भाजपा सरकार बण्या द्वी मैना नि ह्वे छा अर कॉंग्रेस किराण मिसे गे कि मंहगाई बढ़ गे , अल्लू -प्याज मैंगा ह्वे गेन , सिगरेट-दारु बि मैंगा ह्वे गेन।  लोकसभा -राज्य सभा मा मंहगाई पर हो हल्ला मचाणो कोशिस ह्वे।  पर अंत मा कॉंग्रेस तैं बैक फुट पर जाण पोड़ , कॉंग्रेस की ही बेज्जती ह्वे , कॉंग्रेस ही मुख दिखाण लैक नि राइ बल या मंहगाई तो दस सालौ यूपीए की  ही देन च। 

         फिर कॉंग्रेस का हाइ कमांड याने राहुल गांधी का सलाहकारुं तैं याद आइ  बल अरे नरेंद्र मोदी स्विट्जरलैंड से ब्लैक मनी बौड़ैक  लाण त बिसरी ग्याइ। अर इना उना हो हल्ला करे गे बल भाजपा तैं पटखनी दिए जाय।  पण इखम बि मार नरेंद्र मोदीन नि खाइ अर कखि ना कखि कॉंग्रेस पर ही झसांग , खचांग , ढसांग लग गे कि ये भै कॉंग्रेस इथगा सालुं से ब्लैक मनी मामला मा बौं हौड़ किलै पड़ीं छे।  कॉंग्रेसक हाल इन ह्वे जन घ्वाड़ा चढ़णो खरीद पर  बुकण पोड़। 

         धर्मांतर पर कॉंग्रेस अर छुटभया पार्टयूँन राजयसभा नि चलण दे।  कॉंग्रेस खुस छे बल भाजपा फंस गे।  पर ह्वे उल्टु।  छुटभयों   क त कुछ नि ह्वे किन्तु कॉंग्रेस द्वी छ्वाड़न बदनाम ह्वे गे।  एक त कॉंग्रेस पर द्वी चार हिंदु विरोधी हौर तगमा लगिन अर एक अभियोग हैंक बि लग बल कॉंग्रेस नि चांदि कि नरेंद्र मोदीक राज मा विकास ह्वावु , रोजगार मिल अर फॉरेन इन्वेस्टमेंट इण्डिया मा आव।   पैटन  टैंक ले छौ  कि भाजपा कु किला उड़ाए जाए पर यु निर्भागी पैटन टैंक कॉंग्रेसक किला /कोट /फोर्ट तैं इ उजाड़िक अग्वाड़ी बढ़  गे। कॉंग्रेस ना इ सोरग जोग , ना इ नरक जोग अर ना हि झारखंड जोग राइ। 

          अर 31 दिसंबर 14 रात नेवी वळुन पाकिस्तानी समोद्रो बिटेन अयीं एक नाव पकड़ण चाइ तो नाव मा आग लग गे।  3 जनवरी 15 तक कुछ पता नि चौल कि या नाव मा आतंकवादी छया या स्मगलर छया।  इंडियन एक्सप्रेस की खबरूं आधार पर कॉंग्रेसन भाजपा पर अभियोग लगाण लग गे कि स्मगलरक नाव तैं आतंकबादी नाव किलै बुल्याणु च।  कम्युनिकेसन की उस्तादण, मास्टर्याणि   भाजपान उल्टां कॉंग्रेस तैं इ फांसी पर लटकै दे बल कॉंग्रेस पाकिस्तानै सहायता करणि च, सेना कु मनोबल गिराणि च ।  कॉंग्रेसन जु कटघरा भाजपा कुण तयार कौर वै कटघरा पुटुक अफिक फंसी गे। कॉंग्रेस ज्वा झौळ भाजपा तैं जळाणो   ल्है छे वीं झौळन कॉंग्रेसक झुपड़ा इ जळै दे। 

   असल मा कॉंग्रेस भूली ग्याइ कि कॉंग्रेसक समस्या हल अबि भाजपा नी च अपितु कॉंग्रेस का भीतर ही समस्या   समाधान च पर कॉंग्रेस समस्या समाधान भैर खुजणी च।  कॉंग्रेस की समस्या या च कि वा 180 डिग्री मा बदलीं परिस्थिति का अनुसार अफु तैं नी  बदलणि  च अर कम्युनिकेसन स्टाइल , ढौळ , रूप नी बदलणि च।  कॉंग्रेस का वास्ता पारम्परिक ढंग से भाजपा पर तीर नि चलाण चयेंद बल्कण मा गैरपारम्परिक हथियारूं आविष्कार करण चयेंद। 

6/1/15,  Bhishma Kukreti , Mumbai India 

   *लेख की   घटनाएँ ,  स्थान व नाम काल्पनिक हैं । लेख में  कथाएँ , चरित्र , स्थान केवल व्यंग्य रचने  हेतु उपयोग किये गए हैं।

Best of Garhwali Humor in Garhwali Language ; Best of Himalayan Satire in Garhwali Language ; Best of  Uttarakhandi Wit in Garhwali Language ; Best of  North Indian Spoof in Garhwali Language ; Best of  Regional Language Lampoon in Garhwali Language ; Best of  Ridicule in Garhwali Language  ; Best of  Mockery in Garhwali Language  ; Best of  Send-up in Garhwali Language  ; Best of  Disdain in Garhwali Language ; Best of  Hilarity in Garhwali Language  ; Best of  Cheerfulness in Garhwali Language  ;  Best of Garhwali Humor in Garhwali Language from Pauri Garhwal  ; Best ofHimalayan Satire in Garhwali Language from Rudraprayag Garhwal  ; Best ofUttarakhandi Wit in Garhwali Language from Chamoli Garhwal  ; Best of North Indian Spoof in Garhwali Language from Tehri Garhwal  ; Best of Regional Language Lampoon in Garhwali Language from Uttarkashi Garhwal  ; Best of Ridicule in Garhwali Language from Bhabhar Garhwal  ; Best of Mockery  in Garhwali Language from Lansdowne Garhwal  ; Best of Hilarity in Garhwali Language from Kotdwara Garhwal  ;Best of Cheerfulness in Garhwali Language from Haridwar  ;

Garhwali Vyangya , Garhwali Hasya,