बल ए साल बि गढ़वाळम गदन ऐन , भळक ऐन

चबोड़्या - भीष्म कुकरेती 

s - आधा अ 

 बल टीवी मा द्याख बल हर सालों तरां ,

ए साल बि गढ़वाळम बादल फटिन जोर से सद्यनो तरां 

बल टीवी वाळुंन पुरण क्लिपुं तैं नै हिसाब से बताइ कि  ढांगू -उदैपुर मा जोर का गदन ऐन मतबल   बाढ़ ऐ। 

अखबारुं मा त ना पर फेसबुक मा द्याख बल लंगूर-ढांगू -उदैपुर मा कथगै जगा भळक ऐन मतबल भूस्खलन का पुराणी क्लिप ना असली चित्र देखिन। 

मि नि जाणदु कि जान माल कु कथगा नुकसान ह्वे। अब जब सरकार इ नि बताली त मि तै सुपिन थुका आल कि म्यार गां मा क्या नुकसान ह्वे। 

पर मि जाणदु छौं कि ये साल बि टीवी स्टूडियो मा पॉलिटीसयन, पत्रकार अर पर्यावरण वादी हिमालयी व्यवस्था का वास्ता रोला -पिटला अर  दण दण घड़ियाली आंसू अवश्य बगाला अर फिर हैंक साल की बाढ़ -भूस्खलन की जग्वाळ मा फसोरिक से जाला। 

मि नि जाणदु कि ढांगू -उदैपुर वाळुं तै बाढ़ - भूस्खलन का अंदाजा पैलि लगि गे छौ कि ना। 

किन्तु एक बात  त अवश्य ह्वे होलि कि दिल्ली मा अबै दै  कॉंग्रेसन भाजपा सरकार तैं  उनि गाळी दे होलि जन पोर -परार भाजपान कॉंग्रेस सरकार तैं निठल्ला आपदा प्रबंधन कमिसन का वास्ता दे छौ। कॉंग्रेसन भाजपा की तरां अभियोग लगै होलु कि डिजास्टर मैनेजमेंट एक सफेद हाथी च।  अभियोग मा कॉंग्रेस का गाळयूं शब्द वी ही रै होला जु पोर -परार भाजपा का गाळयूं मा शब्द रयोग ह्वे होला। 

मुख्यमंत्री न अवश्य ही दुःख जतै होलु अर टीवी मा बयान दे होलु कि प्रभावितों तैं हर सम्भव सहायता दिए जाली। अखबार सरकार का विरुद्ध ज्यादा नि ल्याखन की चिंता मुख्यमंत्री तैं ज्यादा ह्वे होलि तो अखबारुं मुख बंद करणो वास्ता अखबारुं तैं सरकारी विज्ञापन याने मुख्यमंत्रीक मुखड़ा दिखाण वाळ विज्ञापनुं भेंट दिए गे होलि। 

इख तक कि भूतपूर्व मुख्यमंत्री विजय बहुगुणान बि बाढ़ -भूस्खलन पर  सोनिया जी अर राहुल गांधी जीs  तर्फ़ान अत्यंत चिंता व्यक्त करि होलि।

जन कि हूंद च   कि यमकेश्वर क्षेत्र की विधायिका श्रीमती बड़थ्वाल , विरोधी दल की द्वी और नेत्यांणी श्रीमती कैंतुरा अर श्रीमती बिष्ट ये मामला मा उदासीन ही रै होला।

मि नि जाणदु कि जौंक चौक बगी होलु वूंक  चौक का वास्ता सरकारी अनुदान मीलल कि ना किंतु भौत  सा ग्राम प्रधानुं ये साल नया नया चौक अवश्य बौणल। 

मि क्या जनता बि नि जाणदि कि जौंक सनी/गौशाला  उजड़ी होलि वूंक सनिक /गौशालाक क्या ह्वालु किन्तु सब तैं पता च कि भौत सा पंचायत सदस्यों नई छनि /सन्नी /गौशाला सत -प्रतिशत चिणे जालि। 

कै तैं नि पता कि जौंक कूड़ उजड़ वूं तैं सरकार क्या मुवावजा द्याली पर सब तैं पुरू भरवस च कि ये साल ब्लॉक प्रमुखुं नई चकाचक कोठी देहरादून या कोटद्वार मा अवश्य बणन।  

प्रवासी संस्थौन अपण अपण लियाकत से चंदा भिजण। 

बस कुछ दिन बाद सब्युंन दिवाळी -बग्वाळी -मकरैणी - बिखोत का त्यौहारुं मा बौगे जाण अर फिर तबि खौंळेण /आश्चर्य चकित हूण  हैंक साल फिर कै हैंक जगा बाढ़ आली , भूस्खलन होलु।

रघुकुल रीति सदा चली आई का हम शिष्य छंवां  हमन   तबि बिजण जब हमर नुक्सान ह्वे जालु वै से पैल हमन सियुं रौण ! 

Copyright@  Bhishma Kukreti  27  /8/ 2014       
*लेख में  घटनाएँ , स्थान व नाम काल्पनिक हैं । 

  
Garhwali Humor in Garhwali Language, Himalayan Satire in Garhwali Language , Uttarakhandi Wit in Garhwali Language , North Indian Spoof in Garhwali Language , Regional Language Lampoon in Garhwali Language , Ridicule in Garhwali Language  , Mockery in Garhwali Language, Send-up in Garhwali Language, Disdain in Garhwali Language, Hilarity in Garhwali Language, Cheerfulness in Garhwali Language; Garhwali Humor in Garhwali Language from Pauri Garhwal; Himalayan Satire in Garhwali Language from Rudraprayag Garhwal; Uttarakhandi Wit in Garhwali Language from Chamoli Garhwal; North Indian Spoof in Garhwali Language from Tehri Garhwal; , Regional Language Lampoon in Garhwali Language from Uttarkashi Garhwal; Ridicule in Garhwali Language from Bhabhar Garhwal; Mockery  in Garhwali Language from Lansdowne Garhwal; Hilarity in Garhwali Language from Kotdwara Garhwal; Cheerfulness in Garhwali Language from Haridwar;