इंस्पेक्टर ! मेरी इज्जत -आबरू हर्चिगे …. FIR

 चबोड़्या -चखन्यौर्या -भीष्म कुकरेती 

नेता -इंस्पेक्टर ! कैन बताइ बल पुलिस चौकी इखमी च  ?

पटवारी - जी ! या पटवारी चौकी च। क्या काम च ? 

नेता -मेरी इज्जत -आबरू हर्चि गे वांक FIR दर्ज कराण छे। 

पटवारी - अच्छा ! नाम ?

नेता -मि  क्षेत्र कु विधायक छौं !

पटवारी - एक मिनट …. एक मिनट ! अरे !  म्यार त काम ह्वै गे। 

नेता -कनु क्या काम ह्वे गे ?

पटवारी -वु क्या च।   कुछ दिन पैल क्षेत्र की जनतान शिकायत  याने FIR दर्ज करै छे कि वूंक विधायक पिछ्ला साढ़े चार  साल से हर्च्युं च। 

नेता -पण मीन कै बि समाचार टीवी चैनेल मा अपण हरचणो खबर नि देखि। 

पटवारी -ये क्षेत्र का बारा मा अखबार  तलक समाचार नि छ्पांदन त टीवी चैनेल क्या खबर दिखाला ? 

नेता -आश्चर्य च कि संवाददाता ये क्षेत्र मा नि आंदन ?

पटवारी - जै क्षेत्र मा सडक नि ह्वावन उख … 

नेता -हाँ  बात सै च।  मि तैं बि दस इम्पोर्टेड कारु हूणै बाद बि  पिनस मा आण पोड़ 

पटवारी - ब्वालो।  तुमर परमानेंट एड्रेस क्या च ?

नेता -विधायक निवास , प्रदेश राजधानी। 

पटवारी -विधयाक निवास अर परमानेंट एड्रेस ? इख तुमर गांवक पता बथावो। 
नेता  -एक मिनट हाँ ! मि अपण गांवक एड्रेस भूलि -बिसरि ग्यों।  मि अपण सेक्रेटरी तैं पूछिक बतांदु हां ! 

पटवारी -हां क्या चीज हर्चीं च ?

नेता -अरे मेरी इज्जत -आबरू हर्चि ग्यायि। 

पटवारी -तुम तैं पक्को विश्वास च कि तुमम इज्जत -आबरू छैंछे ?

नेता -हाँ पांच साल पैल लोग इज्जत करदा छा। 

पटवारी -नै नै ! लोग त डौरौ मारन राजू भैया  जन नेताओंक  बि इज्जत करदन। 

नेता -नै न्है ! सची मा लोग भला आदिम बोलिक मेरी इज्जत करदा छा अर सब लोग आदर सत्कार से गंड गंड म्यार खुटम पड़दा छा।

पटवारी -यांक मतबल च पांच साल पैलि तुमम इज्जत -आबरू -सम्मान छैंछे। 

नेता -हाँ बिलकुल मि एक इज्जतदार , सम्मानीय नेता छौ। 

पटवारी -तुम तैं कनकै पता चौल कि तुमर इज्जत -आबरू -सम्मान हर्चि गे। 

नेता -इक आण से पैल मीन एक मार्केटिंग एजेंसी से सर्वेक्षण करवै छौ त सर्वेक्षण से ही  मि तै पता चौल बल इख अब म्यार  क्वी इज्जत -आबरू -सम्मान नि रै गे । 

पटवारी -फिर ?

नेता -फिर मीन अपण स्याळ , नौनु ,  भणजा  भेजिन त ऊंन बि पता लगाइ बल अब मेरी क्वी इज्जत नी बचीं च। 

पटवारी -अच्छा फिर ?

नेता -फिर अब जब विधयाक बणणो बान मि पर्चा भरणों औं त लोग सिवा लगाणो जगा , प्रणाम करणों जगा म्यार मुखुंद थुकणा छन।  फूलूं माळा जगा जुतुं माळा पैराणा छन अर … 

पटवारी -अर क्या ?

नेता -अर  गुलाब जल की जगा गू -मूतौ छिड़काव  करणा छन। 

पटवारी -हाँ फिर तो सचमुच तुमारी इज्जत -आबरू -सम्मान हर्चि गे। 

नेता -हाँ ! 

पटवारी -अच्छा तुम इन बताओ तुम तैं कै पर शक च ?

नेता -अब कै पर शक हूण ?

पटवारी -जन कि कै विरोधी नेतान तुमर इज्जत -आबरू -सम्मान चुरै दे ह्वावु ?

नेता -अब मि साढ़े चार साल से इख आयि नि छौ त मि तै पता इ नी कि म्यार विरोधी को च ?

पटवारी -समर्थकुं पर शक ?

नेता -विधयाक बणणो बाद पैल पैल समर्थक म्यार विधायक निवास मा आंद छा पण मीन एक खूखार डाकु अर एक हत्यारा गुंडा तैं बौडी गार्ड अर सेक्युरिटी गार्ड बणाइ त समर्थकुंन बि मि तैं मिलण बंद करि दे। 

पटवारी -तुम तैं अपण रिश्तेदारुं पर शक ?  

नेता -नौट ऐट आल !

पटवारी -अच्छा तुमर परिवार अर रिश्तेदारुं पर क्वी भगार , लांछन , अभियोग ?

नेता -बताण जरुरी च 

पटवारी -हाँ तबि त मि पता लगौल कि तुमर सम्मान कैन चुराइ ?

नेता -मेरी घरवळि पर शौचालय , अनाथालय , देवालय घोटाला अभियोग कोर्ट मा चलणु च , बेटा पर बलात्कार का चार केस, भाणजा पर ट्रांसफर -प्रोमोसन घूस केस , जीजा अर जंवै  पर आदिवास्युं जमीन हड़पणो केस , ससुर पर डकैती , स्याळ पर क्षेत्रीय खेल घोटाला केस , कक्या ससुर पर चीटिंग केस , कक्या सासु पर बहू बीटिंग केस , भतीजो पर दंगा फैलाणो …आरोप सब कोर्ट मा चलणा छन। 

पटवारी -बस बस ! मि तुमर FIR त नि दर्ज कौर सकुद पण तुम तैं द्वी जघन्य हत्याओं केस मा बंद करणु छौं। 

नेता -क्या ?

पटवारी -हाँ मि तुम तैं जन विश्वास -हत्या अर अपण स्वयम की इज्जत -आबरू -सम्मान की  ह्त्या कु  जुर्म मा कैद  करणु छौं। 



Copyright@ Bhishma Kukreti  5 /10/2013 



[गढ़वाली हास्य -व्यंग्य, सौज सौज मा मजाक मसखरी  दृष्टि से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  के  जाती असहिष्णुता सम्बंधी गढ़वाली हास्य व्यंग्य; ढांगू वाले के  पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले के  भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले के  धर्म सम्बन्धी गढ़वाली हास्य व्यंग्य;पौड़ी गढ़वाल वाले के वर्ग संघर्ष सम्बंधी गढ़वाली हास्य व्यंग्य; उत्तराखंडी  के पर्यावरण संबंधी गढ़वाली हास्य व्यंग्य;मध्य हिमालयी लेखक के विकास संबंधी गढ़वाली हास्य व्यंग्य;उत्तरभारतीय लेखक के पलायन सम्बंधी गढ़वाली हास्य व्यंग्य; मुंबई प्रवासी लेखक के सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक का सरकारी प्रशासन संबंधी गढ़वाली हास्य व्यंग्य; भारतीय लेखक के राजनीति विषयक गढ़वाली हास्य व्यंग्य;सांस्कृतिक मुल्य ह्रास पर व्यंग्य , गरीबी समस्या पर व्यंग्य, आम आदमी की परेशानी विषय के व्यंग्य, जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य श्रृंखला जारी ...]