माइक्रोवेव ओवन माँ पिंडाळु पत्तों पत्यूड़ /गुंडळ

(Kumaoni Food, Garhwali Food, Ethnic Food of Uttarakhand , Himalayan Food) 

             सर्यूळ   - भीष्म कुकरेती 

 

 

  मीन मुंबई मा भौत सी बुडड़ी/अदबुडेड़ अर जवान जनान्युं तै पूछ बल क्या वो पिंडाळु  पत्तों पत्यूड़ /गुंडळ  बि बणाँदन ? तो तकरीबन सब्युं बुलण छौ बल पत्यूड़ /गुंडळ खाणो  ज्यू तो भौत बुल्यांदो पण इख मुंबई मा वो सुविधा नि छन जो गांवुंम पत्यूड़ /गुंडळ पकाणो छौ ।

असल मा सुविधा त मुंबई -दिल्ली मा बि छन पण हम प्रयोग नि करदां ।

 चलो आज तीन तरा से पिंडाळु  पत्तों पत्यूड़ /गुंडळ  बणाण सिखला  

                                पत्तों पत्यूड़ /गुंडळ  बणाणो सामग्री 

१- पन्दरा बीस टहनी समेत पिंडाळु पत्ता 

२-पिस्युं मसाला - धणिया , जीरू, मर्च , गरम मसाला , लूण  

३- भेषण , ग्युं आटु 

४-तेल   

५- हरी मर्च , साबुत भंगुल या साबुत धणिया अर जीरू
  

                            ब्यूंत (विधि ) 

चार बड़ा बड़ा पिंडाळु पत्ता अलग धौरि द्यावो   ।

पिंडाळु पत्तौं तैं बरीक काटिक फिर ध्वावो अर पाणि निटारि द्यावो ।

एक गैरि थाळी या परात मा कट्यां पत्ता धारो फिर ये मा भेषण अर थ्वड़ा सि आटु मिलावा, पिस्यां मसला-लूण  मिलावा अर पाणि दगड़  खूब फ्यांटो। ध्यान राखो कि लुगदी ना तो जादा गाड़ो हवावो ना ही पंदयर ह्वावो । एक द्वी हरी मर्च बि दगड़म बरीक काटी द्यावो ।

                              तवा   मा पत्यूड़ों केक बणाणो तरीका 

 द्वी पिंडाळु पत्ता बिछाओ अर लुगदी तैं पत्ता मथि धारो । फिर  अळग बिटेन द्वी पत्ता धारो अर लुगदी तैं चारों तरफ से बांदी द्यावो । ध्यान दीणै बात च कि लुगदी भैर नि आण चयेंद ।

अब  लुगदी तैं स्टोव मा धर्युं तवा मा लुगदी (जो पत्तौं भीतर च ) तवा मा धारो अर ठंडी आंच मा पकण द्यावो । दस मिनट बाद फरकावो अर तवा मा पकावो । आधा या पौण घंटा तलक पकांद जावो । बीच बीच माँ फरकांद बि जावों । जब भैर का पत्ता जळण लगन तो समझो 

पत्यूड़ पाकी ग्यायि । पक्युं केक तैं उतारि द्यावो ।

                              माइक्रोवेव ओवन मा   पत्युडो  केक बणाणो तरीका 

 

 माइक्रोवेव मा  केक बणाण सरल च । 

वेसल पर तेल लगावो अर उख पुटुक लुगदी भौरि द्यावो अर कम से कम दस बारा मिनट तलक पकावो फिर फरकावो अर पांच मिनट तलक पकावो ।

                                  केक तैं कटण  

                      

अब बारी च पत्यूड़ों/गुंडळो   केक काटणो  ।केक तैं बर्फी जन चाक़ू से काटो अर छवटा -छवटा टुकड़ा बणावो ।

                                     केकक  टुकड़ो तैं भुनण  

 पेल कढ़ाई मा तेल गरम कारो , तेल मा धणिया या भंगुलो बीज भूनो अर   केक का टुकड़ा डाळो अर उनि भूनो जन भुजी भुणदन  । 

बस अब पत्यूड़ /गुंडळ तयार च । पण पत्यूड़ /गुंडळ ठंडो ही खाण निथर किंक्वाळी लग जांदी ।

Copyright Bhishma  Kukreti 21/8/2013