'आर्मी ऑफिसर पोजिसन' की पोजीसन कमजोर किलै चलणि च ?

भीष्म कुकरेती 


 रोजगार - हे भै इंडियन आर्मी ऑफिसर पोजिसन ! ये क्या हाल बणयु त्यार ? इन लगणु च बीमार चलणु छे ! 
आर्मी ऑफिसर पोजिसन- अरे ना पूछ !
रोजगार - ह्याँ कपड़ा त त्यार वी कड़क छन पण बानी नि दिख्याणि ? 
आर्मी ऑफिसर पोजिसन-हाँ !
रोजगार -अरे कै दिन तो तीम  क्या चमक छे , तड़क -भड़क छे , त्यार  क्या रूतबा छौ , रौब -दाब छौ , क्या हाम छे - प्रसिद्धि छे !
आर्मी ऑफिसर पोजिसन-हाँ 
रोजगार -अरे कैदिन भारतीय जवान सुपिनो मा बस आर्मी मा कप्तान-ब्रिगेडियर बणनो , नेवी अधिकारी या स्क्वाड्रिन लीडर बणणो ख्वाब दिखदा छा 
आर्मी ऑफिसर पोजिसन-हाँ पण 
रोजगार -कैदिन  भारतीय नौन्याळ  पन्दरा  सालौ ह्वाइ ना कि NDA मा भर्ती होणो नियम या लेफ्टिनेंट कन बणे जावो की किताब खरीददो छौ I 
आर्मी ऑफिसर पोजिसन- हां , तबि त मि रौब मा रौंद छौ कि मि हरेक भारतीय जवान की पहली अर आखरी पसंद छौ -सुपिन छौ I 
रोजगार -हाँ ! अर  त्वै तै पाणों बान मध्यम वर्गीय नौन्याळ क्या नि करदा छा ! 
आर्मी ऑफिसर पोजिसन- क्या दिन छ्याइ ना ?
रोजगार -हाँ हाँ म्यार रिकौर्ड मुताबिक टेरिटोरियल   आर्मी मा दस हजार  से जादा अधिकार्युं पोजीसन भरण बाकि च अर इनि नेवी मा 1400 करीब अर 1000 का करीब एयर फ़ोर्स मा आधिकार्युं पोजीसन भर्याण बाकि च 
आर्मी पोजिसन- यीँ  अजीब हालात देखिक ही तो मी चिंतित छौं अर दुख्यर चलणु छौं I 
रोजगार -इन क्या बिजोग पोड़ि गे कि गर्व अर आदरणीय पोजीसन का प्रति भारतीय जवानुं रूचि घटणि च ? 
आर्मी पोजिसन- ह्याँ ! अचकाल नौन्याळ प्राइवेट कंपन्यूं प्रति जादा आकर्षित छन I 
रोजगार -हाँ MNCयूँ मा तनखा बि तौलि भौरिक मिल्दि अर बकै मौज मस्ती अलग I 
आर्मी पोजिसन-तनखा त अब भारितीय सेना मा कम नि च पण युवाओं मा भारतीय सेना मा जाणो आकर्षण भौति कम ह्वे गे I 
रोजगार -हाँ अचकालौ छोरी -छ्वारा जीवन का मूल्यों से जादा कमाई अर भौतिक सुखों तरफ चलण गीजि ग्याइ I 
आर्मी पोजिसन-वी त समस्या ह्वे गे  भारतंम  अब जीवन मूल्यों जन कि इमानदारी , देशभक्ति से जादा तड़क भड़क की जिन्दगी प्यारी ह्वे ग्यायि I 
रोजगार -अर फिर सेना की जिन्दगी ऊबड़ -खाबड़ अर स्ट्रेस की जिन्दगी च तो अचकाल का युवा इन स्ट्रेसफुल जिन्दगी से दूर हि रौण चाणा छन I 
आर्मी पोजिसन- हां सबसे बड़ी दिक्कत च सब जगा जीवन -मूल्यों मा गिरावट अर वां से कथगा ही नई नई समस्या खड़ी हूणा छन I भारतम सेना मा अधिकार्युं कमी का पैथर एक कारण जीवंन मूल्यों मा कमी बि च I देशहित, राष्ट्रहित  अब व्यक्तिहित क समणी  भौत छ्वटो ह्वै गे , गौण ह्वेगे  I 
रोजगार -हां कुछ हौर मूलभूत समस्या बि त छन आर्मी , नेवी या एयर मा ?
आर्मी पोजिसन-हां जन बच्चों क बान लिमिटेड स्कूलूं इंतजाम , सेना नौकरी इनि नि छोडि सकदां , स्लो प्रोमोसन , पोस्ट रिटायरमेंट की कुछ समस्या आदि 
रोजगार -पण कुछ तो करणै ह्वेला कि ना ? 
आर्मी पोजिसन-हाँ भौत सा चेतना जागृति का प्रोग्राम छन I फिर सेना मा बि अब बढिया तनख्वा अर सेवा निवृति मा लचीलापन आदि जन इंतजाम हूणा छन अर कथगा इ नया प्रोग्रैम छन जां से भारतीय जवान सेना मा भर्ती हूण मा प्रेरित ह्वावो I 
रोजगार - मतलब तेरी तब्यत ठीक हूणों आसार छैं छन ?
आर्मी ऑफिसर पोजीसन - हाँ 
रोजगार - फिर ठीक च I जय हिन्द !
आर्मी ऑफिसर पोजीसन -जय हिन्द I 


Copyright @ Bhishma Kukreti  4/8/2013