उत्तराखंडी ई-पत्रिका की गतिविधियाँ ई-मेल पर

Enter your email address:

Delivered by FeedBurner

उत्तराखंडी ई-पत्रिका

उत्तराखंडी ई-पत्रिका

Tuesday, June 18, 2013

ब्लेम गेम ट्रेनिंग सेंटर याने भगार लगाणौ प्रशिक्षण केंद्र

गढ़वाली हास्य -व्यंग्य 
 सौज सौज मा मजाक मसखरी 
  हौंस,चबोड़,चखन्यौ    
  सौज सौज मा गंभीर चर्चा ,छ्वीं  

                               ब्लेम गेम ट्रेनिंग  सेंटर
                              याने
भगार लगाणौ प्रशिक्षण केंद्र

                              

                 चबोड़्या - चखन्यौर्याभीष्म कुकरेती
 
(s = आधी अ, आधी अ//s= क, का , की,, कु के ,को आदि)


           अचकालौ जटिल जिन्दगी मा मनिखौं तै परिवार मा , शिक्षण संस्थानों मा , समाज मा , नौकरी मा, व्यापार मा, राजनीति मा अर सबि  जगा ब्लेम गेम, दोषारोपण खेल या भगार लगाणो खेल खिलण हि पोड़द। बगैर ब्लेम गेम का अचकाल कुत्ता बिरळ बि ज़िंदा नि रै सकदन।
           पण भारत मा व्यवसायिक स्तर का ब्लेम गेम ट्रेनिंग सेंटर नि होण से हुन्यार युवाओं तैं बड़ी तकलीफ होणि रौंद। इलै हमारी शिक्षण संस्था ज्वा भ्रस्टाचार करणों बाद बि पकड़ मा नि आण, स्पॉट फ़िक्षिंग या मच फ़िक्षिंग करणों बाद बि संसद सदस्य कनै बणन  जन प्रशिक्षण का वास्ता कुख्यात च, चर्चित च अब एक नया कोर्स लाणी च। ये नयो  कोर्स को नाम च हाउ टु ब्लेम अदर्स शेमलेसली फॉर युवर मिस्टेक्स या अपण दोष दुसर पर कनकै लगाण (अपण पूठो गू दुसरो पूठ पर लपोड़ण) या बेशर्मी से दूसरों पर दोषारोपण कैसे किया जाता है।
 ये कोर्स मा सिलेबस प्रशिक्षार्थी हिसाब से डिजाइन करे गे। ये कोर्स मा निम्न विषय छन -
१-ब्लेम गेम की परिभाषा अर इतिहास जां से विद्यार्थी सीख सकुद यदि तुम से गलति ह्वे गे तो कनकै अपण तौळ वाळ पर भगार लगैक पदोन्नति पाए जांद।
२- ब्लेम गेम कु कु खेल सकदन को  कोर्स- ये कोर्स से सबसे जादा फैदा कौंग्रेस विरोधी विचारधारा का राजनीतिज्ञों तैं होलु। इखमा हम सिखौला कि जब धुर कौंग्रेस विरोधी राजनैतिक पार्टी या नेता कॉंग्रेसौ  खुकली मा बैठो तो अपण कॉंग्रेसौ  खुकली मा बैठणो दोष कै तरां से  साम्प्रदायिक ताकतों पर लगाये जै सक्यांद . ये कोर्स मा लालू प्रसाद यादव , मुलायम सिंह यादव , बहन मायावती , करुणा  निधि, अजित सिंह वल्द  चौधरी चरण सिंग, नीतेस कुमार की जीवनी वीडिओ ग्राफी की सहायता से पढ़ाए जालि।
३- खावन प्यावन हौरुं क अर मार खावन गौरुंक - इखमा मा हम सिखौंदा कि दोषारोपण से दुसरो नुकसान कनै करे जांद। ये कर्स मा उदाहरणो साथ हम दिखौला कि कन  मनमोहनी कौंग्रेस को रीफौर्म से मंहगाई बढ़द, बेरोजगारी बढ़द तो कॉंग्रेसी दोषारोपण करदन  कि चूँकि भारतीय लोग मिनरल वाटर, विटमिन युक्त भुजि खाण गीजि गेन तो गरीबी , मंहगाई, बेरोजगारी मा इजाफा ह्वे ग्यायि
४- ग्रुप ब्लेमिंग या भगार लगाणम  कवारौळि प्रयोग - इखमा हम संसद या विधान सभाऊं  क्लिप दिखैक पढौला कि सामूहिक घ्याळ , सामूहिक कवारौळि से अपण गलती को ठीकरा हैंक पर कनै फोड़े जांद।
५- लीगल ब्लेमिंग - यो ख़ास ख़ास विद्यार्थ्युं वास्ता एक क्रैश कोर्स च- जन कि कपिल सिब्बल, अरुण जेटली जन नेता ये कोर्स से फैदा उठे सकदन । इखमा हम सिखांदा कि  संवैधानिक संस्थाओं जन कि  कोंट्रोलेर जनरल ऑफ ऑडिट या चुनाव कमिसन की खुले आम कै तरां से न्यायिक पद्धति से धज्जी उड़ाए जै सक्यांद।
६- भैंसों गुस्सा मकड़ा पर - यु कोर्स केवल कॉंग्रेस्यूं वास्ता ख़ास बणाये गे। इखमा हम सिखौंदा कि जब राहुल गांधी या सोनिया गांधी को नेतृत्व मा पार्टी चुनाव हारि जावो तो सरा दोष अपणी पार्टी का कार्यकर्ताओं पर कन लगाये जाण चयेंद।
७-चिराग तले अन्धेरा मा दोषारोपण का दिया - ये कोर्स मा हम सिखौंदा कि दिल्ली मा या कै बि राज्य की राजधानी मा जथगा बि अपराध ह्वावन तो  नक्सलवाद , माओवाद, आतंकवाद , सम्प्रदायवाद या विदेशी ताकतुं  पर कै तरह से दोषारोपण करिक  जुमेदारी से बचे सक्यांद।
८- त्यार पड़ददान पाणि भीड़ी छौ तो मीन त्वै  थंचकाण - आपन भेड़िया-मेमने की कथा त पौढि होलि। इं कथा को गढ़वाळीकरण च बल एक बिठ (सवर्ण ) का हाथ कै तै पिटणो खयाणा/ खुजल्याणा छा वैन एक हरिजनौ नौनु घपेल  दे अर कारण बथै बल चूंकि ये हरिजनों पड़ददान कबि पाणि धार भीडि छौ त मीन ये नौनु तै पीट। ये कोर्स मा हम सिखौला कि संस्था , संस्थानों मा अपण गलत्युं दोष निवर्तमान अधिकारियों पर याने अपण दोष कै हिसाब से इतिहास पर लगाण चयेंद।
९- जै डाळि फल खावो वीं डाळि  तैं इ गाळि द्यायो - ये कोर्स मा सीख च बल जै बि संस्थान मा काम कारो अपणो पापौ सारा दोष संस्थान पर डाल़ो जन कि मनमोहन जी कोलेसन सरकार का स्वामी छन अर सरा दोष कोलेसन  पर लगाणम उस्तादुं उस्ताद छन।           
१० -कबि बि जुमेवारी नि लीणों तरीका -ये सैलेबस से हम सिखौला कि तुम से कथगा  बि भयंकर आग लगि जावो कबि बि अपण गलती नि मानण, अफु तैं जुमेवार नि बथाण  अर तर्कसहित  सरा  दोष अपण विरोधियों पर (खासकर जु समणी नि ह्वावो या जै तैं खुज्याण नामुमकिन ह्वावो ) लगै दीण चयेंद
११ -दंगऴयाण से पैल भगार लगाणौ कौंळ - ये कोर्स मा हम अमेरिकी अधिनायकवाद का क्लिप दिखैक पढौला कि दुसरो देस पर कब्जा करणों बान पैल कै तरां से कै बि देस पर दोषारोपण कै हिसाबन करण चयेंद कि संयुक्त राष्ट्र बि अमेरिकी अधिनायकवाद को समर्थक ह्वे जांद।
इनि निर्द्वंद दोषारोपण करणों सौ से बिंडी तरीका हम शिक्षार्थियों तैं सिखौला। 
व्यवहारिक ज्ञान सिखाणों बान हमर कोलेबोरेसन राजनैतिक पार्टी अर ब्यवसायिक घरानों दगड़ च। हमर संस्थानम दोषारोपण का विशेषग्य नेता, अधिकारी  अर उद्योगपति विजिटिंग प्रोफ़ेसर छन।
  



Copyright @ Bhishma Kukreti  18/06/2013    
(यह लेख सर्वथा काल्पनिक है )

No comments:

Post a Comment

आपका बहुत बहुत धन्यवाद
Thanks for your comments