कन बिजोग पोड़ ! जु तौंकि निंद फिर खुलि गे

गढ़वाली हास्य व्यंग्य

हौंसि हौंस मा, चबोड़ इ चबोड़ मा

                              कन बिजोग पोड़ ! जु तौंकि निंद फिर खुलि गे

                                                     चबोड्या: भीष्म कुकरेती

(s=-माने आधी अ )

कुज्याण कथगा सालों परांत सि दिखेन धौं! मिन क्या हिन्दुस्तान का सबि हिन्दुउंन सोचि आल छौ अब सि सद्यानो समाधि जोग ह्वे गेन। हम सब्युं तैं अंथाज बि नि छौ सि अबि बि राम भक्त छन। हमन सोचि आल थौ अब सी शिव भक्त ह्वेक मथुरा-बृंन्दावनम पेड़ा चटकाणा होला या बनारसम शिव मंदिरों समणि भांग को भोग लगाणा होला!

पण कुनगस सि ब्याळि सि फिर दिखे गेन अर ये म्यार भुभरड़ ! सि एक चौबटम घ्याळ करणा छ्याइ या किराणा छया बल 'राम मन्दिर वहीं बनेगा'- 'राम मन्दिर वहीं बनेगा'.

सबि हिंदुउंन त समझि छौ बल राम मंदिर उखमि बौणि गे होलु त यि राम भक्त थक बिसौणो बाण फसोरिक से गे होला! अब जब यि लोग 'राम मन्दिर वहीं बनेगा' को हल्ला करणा छन तो हिंदुओं मा जाग ह्वे बल अबि तलक 'राम मन्दिर वहां नही बना'.

मीन एक राम भक्त तै पूछ," ये भै ! अबि तलक उखम राम मन्दिर नि बौण त तुम फिर कख छया?"

वूंन जबाब दे,"कखि बि ना?"

मीन पूछ," औ त तुम ऊं तै अड़ाणौ जयां रै ह्वेला जो अपण ब्वे-बुबों बुल्युं नि माणदन अर वूं तै राम को बतायों बाट पर चलण सिखाणा रै होला ?"

रामभक्तों उत्तर छौ," नै नै यो काम हमर नी च।"

मीन पूछ," तो फिर तुम वूं आधुनिक रावणों याने बलात्कार्युं तै जेल भिजवाणा रै ह्वेल्या जो जनान्युं तै कमोडिटी समजदन?"

राम भक्तो जबाब छौ।" यो बि हमर काम नी च "

मीन पूछ," त फिर तुम रामक आदर्श याने एक पत्नीवाद को पाठ लोगुं तै पढ़ाणा रै ह्वेल्या अर यांमा तुम 'राम मन्दिर वहीं बनेगा ' की बात बिसरि गे ह्वेल्या।"

राम भक्तन रुसेक बोलि," तुम लगता है कॉंग्रेसी हो। रामक आदर्श की बात करणों हमर काम नी च।"

मीन पूछ,"तो फिर आप हनुमानौ आदर्श याने भक्ति याने आध्यात्म की फुवार लोगुंम बंटणा रै ह्वेल्या?"

एक बजरंग दलीन उत्तर दे," हम अचकाल हिंदुओंम हथियारों से रक्षा बात सरांदा (फैलांदा). भक्तिs बात करण हमर काम नी च"

मीन पूछ," ह्यां त तुम अब तलक छया कख?"

एकान जबाब दे," हम वेलेंटाइन डे मनाण बंद कराणा छया।"

हैंकाक जबाब छौ," हम खामांखां शाहरुख खान या अमीर खान की फिल्म बंद कराणम व्यस्त छया।"

तिसरो जबाब छौ," हम एम् . ऐफ़ हुसैन तै देशनिकाला करण मा व्यस्त छया।"

इख पर मीन पूछ," पण फिर अचाणक तुम अच्काल राम मन्दिर वहीं बनेगा ' का नारा लगाणा छंवां?"

कैन बि जबाब नि दे।

मीन ब्वाल," औ ! त चुनाव नजीक छन त तुम तै राम मन्दिर याद ऐ गे हैं ?"

पण ऊंन मेरी बातो उत्तर नि दे।

क्या काठे हांडी पर बार बार चुलुम खाणों बणि सकदो?

Copyright@ Bhishma Kukreti 7/02/2013