केका बाना फ्वडी हमन घुंडा मुंड

-डॉ नरेन्द्र गौनियाल 

केका बाना फ्वडी हमन घुंडा-मुंड 
केका बाना करी छै हमन रैली 
केका बाना करी छौ हमन धरना-प्रदर्शन 
केका बाना गै छाया दिल्ली 
केका बाना खैनी हमन गोळी 

गौं खाली 
कूड़ी उजडी 
 पुंगडी बांजी 
गौ बिटि 
भाजि गैनी लोग 
एक हैंका सिकासेरी 
एक हैंका देखा देखी 

गौ मा रैगेनी 
कुछ बीमार 
कुछ बेरोजगार 
कुछ कूड़ी जग्वल्दा 
दाना-दीवना लाचार 

पहाड़ों मा 
विकास कि बात पर 
मांगी छौ अलग राज 
न्यार ह्वैकि बि 
क्य पै 
राज्य लेकी बि 
क्य ह्वै 

शहरों मा 
झर फर
गौं की दशा 
जर जर
मैदानों मा 
चक्रचाळ 
पहाड़ों मा 
सुनताळ।

     डॉ नरेन्द्र गौनियाल ..सर्वाधिकार सुरक्षित  narendragauniyal@gmail.com