उत्तराखंडी ई-पत्रिका की गतिविधियाँ ई-मेल पर

Enter your email address:

Delivered by FeedBurner

उत्तराखंडी ई-पत्रिका

उत्तराखंडी ई-पत्रिका

Monday, November 5, 2012

सन 2050 मा कॉपीराईट की दादागिरी

Critical review of Garhwali satirical prose- 87

गढ़वाली हास्य व्यंग्य

चबोड़ इ चबोड़ मा

 

              सन 2050 मा कॉपीराईट की दादागिरी

                       चबोड्या : भीष्म कुकरेती

 

(ये लेख की कल्पना मीन तब कौरी छे जब एक अमेरिकीनन हल्दी तै अमेरिका माँ पेटेंट करे छौ . आज लेख पूरो ह्वाई )

 

" ए भुलि ! क्या ह्वाई ! त्यार मुख पर सुबर सुबर खारो किलै पोड्युं च ? "

 

: अरे नि जैन वु नेता सोरग , उखि रैन नरक भुगणा जौन इंटरनेशनल कॉपीराईट ऐक्ट पर मुहर लगाईं ."

" ह्यां ह्वाई क्या च जु तु सुबर सुबर नेताओं तै कुटबाग दीणि छे ?"

 

" हूण क्या छौ . रोज रोज भितरौ ट्वाईलेट मा झाड़ा करदो करदो बिखळाण पोडि जांद त मि आज सुबेर ब्यणस्यरिखम गां से तौळ अपण पुंगड़म खडिको डाळ तौळ ग्यों उख़ मीन द्वी पथरूं चुल बणाई अर हौगी हागिक आई छौ कि म्यार टैबलेट पर कें अमेरिकी कंपनी क मैसेज ऐ ग्यायी कि चूंकि पथरों चुल बणैक हगणो तकनीको कापिराईट वूं मा च अर मीन ऊं तै ऐडवांस मा चुल बणैक हगणो तकनीको प्रयोगौ बान ना त दरख्वास्त नि दे छौ अर ना इ ऐडवांस फ़ीस भोरि छे त ग्विरमिलाक से पैल रौयल्टी का द्वी सौ डौलर मय भारो . अब अपण पुंगड़ मा अपणो पथरो चुल बणैक झाड़ा करण मा बि यूँ अमेरिक्युं तै रौयल्टी द्याव ! इ क्वी न्याय च ? निसाब च ?"

 

" ह्यां पण तु त जाणदि इ छे कि अमेरिकी सेटेलाईट लग्याँ छन त तीन कै बकर्या बुट्या तौळ झाड़ा जाण छौ . मि त बकर्या बुट्या तौळ इ झाड़ा जांदु कुज्याण कनकै बकर्या बुट्या तौळ सेटेलाईट फेल ह्वे जांद धौं ! उखाक इमेज अमेरिकी सेटेलाईट नि पकड़ सकुद ."

 

"पण हमर पुंगड़ो मा कखि बि बकर्या बुट्या बि त नीन! अब कब तलक हम लोग छ्वटि छ्वटि बातों पर अमेरिकी कंपन्युं तै रौयल्टी दीणा रौंला ?"

" हाँ त बुनाइं , अरे ये अमेरिकी दादागिरी क बि क्या बुलण भूलि ! परसिपुण मेरि बेटि कौंक गौड़ी गैबण छे अर बियाण माँ बगत छौ त मेरि बेटी अर जंवै न अमेरिकी कंपनी 'ऐनिमल डेलिवरी टेक्नीक ' कुणि ऐडवांस नि भेजि . अचाण्चक वा गौडि बिये ग्याई . बेटिंन वीं गौडिक नाळु क्या काट कि वैबरी सैटेलाईट मेसेज आई कि गौड्यु नाळु काटणो पेटियंट या कॉपीराईट हनन को वजै से फीस अर डंड मिलैक चार सौ डालर भौरों . वैबरी इ भरण पोडिन पट चार सौ डालर।"

 

" अब क्या लगौं अपण मैतो छ्वीं . हमर बूड खूडू अपण अदरको जलड बचायां छन त वां पर त या या अमेरिकी दादागिरी चौल नि सकदी पण हर साल अपणों अदरक खड्यारिक बूणों रौयल्टी पांच सौ डालर एक अमेरिकी कंपनी तै दीणी पोडद किलैकि वीं कंपनी न अदरक खड्यानो तकनीक अपण नाम पर रजिस्टर्ड करीं च ."

' कख लगाणी छे तू छ्वीं . यूँ अमेरिक्युं न त हथन मुंगरी उदाड़नो तर्कीबौ बि पेटेंट करयाँ छन अर हर साल हम लोगुं तै मुंगरी उदाड़णो तरीका की फीस वीं खबेस कंपनी तै दीण पोडद "

" ये दीदी ! यी सुबेर सुबेर पंडिजी अर झाड़ ताड़ लगाण वळ जिठा ज्योर तै पुलिस पकडिक किलै लिजाणी च ? जरा पूछ्दी जरा !"

" ये पंडित द्यूर ! या पुलिस सुबेर सुबेर ..?"

 

" अरे ए बौ ! क्या बोलवां ईं अमेरिकी गुळादंगी कुणि . ब्याळी मीन अपण जजमानो इख काल सर्प योग की पूजा कार अर ये मान्त्रिक भुलान दूध फूल गाड त एक अमेरिकी कंपनी बिटेन इमेल से हम दुयुं कुण मेसेज आई बल हमन कॉपीराईट या पेटेंट नियमु उल्लंघन कार तो फीस अर डंड मिलैक हजार हजार डौलर भारो । हम दुयुं न जबाब दे कि हमारा खानदान हजार साल से इन पूजा करणा छन त हमन डंड क्या फीस बि नि भरणाइ। बस वीं कंपनीन इलेक्ट्रोनिकलि पुलिस मा ऍफ़ आइ आर दर्ज कराई दे . त पुलिस पकडिक लिजाणि च . अब हमारा बाब ददों न पूजा पाठ , झाड़ ताड़ दीणों तरकीव कॉपीराईट नियमो तहत रजिस्टर्ड नि कराई अर अमेरिकी कंपन्यूनं रजिस्टर्ड कराई त अपणों बणायों तरकीबो की बगैर बातो फीस अमेरिकी कंपन्यू तै दीणों वाध्य छंवां ."

 

" यी राम दां ! क्वी नेता हुंद ना जु यूं अमेरिकी कंपन्यू खिलाफ आवाज उठांदु ."

 

xxxxx

"भाइयो अर बैण्यु मि नेता बुलणु छौं . हमारा सौब पैत्रिक तकनीको तै अमेरिकी लोगु न पेटेंट करे याल अर यां से हमारा हजारो साल की अपणी तकनीक पर भी हम तै रौयल्टी भरण पोड़णि च . यु अत्याचार च , यु अनाचार च . मी कापीराईट अर पेटेंट नियमु विरुद्ध हड़ताल करण वाळ छौं, सत्याग्रह करण वाळ छौं।"

" नेता जी! मि पुलिस इन्स्पेक्टर छौं .आपन पेटेंटेड अर रजिस्टर्ड भाषणों अर सत्याग्रह तकनीकौ कापीराईट कु उल्लंघन कार पैल कापीराईट उल्लंघन की फीस अर डंड भौरों तबि आप सत्याग्रह करी सकदवां।"

 

Copyright@ Bhishma Kukreti 7/11/2012

 

No comments:

Post a Comment

आपका बहुत बहुत धन्यवाद
Thanks for your comments