ठुल्लो आई.ए.एस. अधिकारी क अपण कणसो तै अड़ाण

गढ़वाली हास्य व्यंग्य साहित्य

चबोड़ इ चबोड़ मा, हौंस इ हौंस मा

                           ठुल्लो आई.ए.एस. अधिकारी क अपण कणसो तै अड़ाण

 

                                चबोड्या- भीष्म कुकरेती

 

ठुल्लो आई.ए.एस अधिकारी न अपण कणसो अधिकारी तै इन समजाई

- हे कणसो अधिकारी ! ईं प्रशासन कि दुनिया मा सब कुछ चलायमान च . अचल छन त प्रसाशनिक अडंगा, प्रशासनिक घमंड, फाइल, फैलूं मा लुकायुं अर लुक्युं राज अर फायलूं मा पड़ी धूल.

-पण, महोदय ! मंत्री जी बि त अचल छन

-बत्स! मंत्री पद अचल च मंत्री चलायमान छन . एक मंत्री आन्दु अर फिर जान्दु अर हैंको आन्द .मंत्री असल मा गौन्त्या छन या नारद योनी का छन जु एक पद पर नि रै सकदन

-महोदय! हमारो मन्त्र्युं प्रति क्या क्या कर्तव्य छन ?

-हमारो मंत्र्युं प्रति क्वी कर्तव्य नी छन. हम सिरफ़ मंत्र्युं तै सायता करदवां कि वो विभाग क वास्ता जादा से जादा बजट लावन चाहे मंत्री लोग पार्टी. फिनेन्स मिनिस्टरी से , prime मनिस्टर/मुख्यमंत्री से , या जनता से आतंकित रावन पण मंत्री क असली काम विभाग क बान बजट ल़ाण च अर हमारो ये पुण्य काम मा मंत्री जीक मदद करण च.

-महोदय आतंक तै जरा ठीक से बिंगाओ

-हम तै इ दिखण चएंद कि मंत्री हर समय आतंकित राओ या कै हैंक तै आतंकित करणो राओ. जब बि राजनीतिग्य तरास मा हूंद त हम प्रशसकीय अधिकार्युं कि महत्ता बढ़दि . यदि मंत्री तरास मा नि ह्वाओ या आतंकित नि ह्वाओ त हमारि कबि बि पूछ नि होंदी. त हमारो पैलो अर हरेक दिनौ काम च कि मंत्री जी आतंकित ह्वावन या परेशानी मा ह्वावन.

-पण ब्याळी मंत्री जी बुलणा छया कि मंत्री लोग प्रजातंत्र का खाम.खम्बा छन अर ऊं तै जनता निर्वाचित करदी

-प्रिय ! हरेक मंत्री तै प्रजातंत्र मा अधकार च कि वो गलत फहमी मा राउ . प्रजातंत्र मा हरेक मंत्री तै अधिकार च कि वो अपणि गलत फहमी दूर नि कारो

-पण आप बि अर मी बि दिखणा रौंदा कि मंत्री अर सांसद टी.वी चैनेलो मा बुलणा क्या धौंस दीणा रौंदन कि वो त जनता क चुन्यां मनिख छन.

- हाँ पण असलियत या च कि पार्टी का बलशाली लोग टिकेट बाँटदन ना कि जनता. हम प्रशासनिक अधिकार्युं तै या बात समजण जरूरी च कि क्वी बि मंत्री जनता क नी चुन्युं च बल्कण मा पार्टी क फुन्द्यानाथ ही सांसद या विधयाक का चुनाव करदन.

- पण आखिरैं त जनता ही चिनाव करदी कि ना ?

- बत्स! हाँ दिख्यांद त यो यि च पण जनता मा क्वी हौरी आल्टरनेट नी च . जनता तै वूं मांगन ही चुनण पोड़द जौं तै पार्टी न चुनाव मा खड़ो कार.

- पण मंत्री त मंत्री ही होंद.

- हाँ प्रजा तन्त्र मा इनी होंद. हमारो मंत्रालय मा एक चपड़ासि क कम से कम कुछ योग्यता हून्दन वै तै प्रशिक्षण दिए जांद तब वो चपड़ासि क काम पर लगद . पण मंत्री बणनो बान ना इ क्वी प्रशासनिक योग्यता चएंदी अर ना ही प्रशिक्षण.

- अर हम प्रशिक्षित अधिकारी मंत्र्युं तै सिवा लागौन्दा

- ये भै! कमअनुभवी अर अप्रशिक्षित मंत्री ही त हम अधिकार्युं तै चएंदन. अनुभवी अर अप्रशिक्षित मंत्र्युं क वजै से ही हमारि पूछ होंद.

- हाँ यू त सै च कि ..

-अर इख्मि त हमारि अपण देस सेवा करणो अवसर मिल्दो .

जी ?

- अरे भै ! कमअनुभवी अर अप्रशिक्षित मंत्र्युं कि मदद करण ही हमारो कर्तव्य च अर देश भक्ति बि .

-अर फिर मंत्र्युं बणईं योजना ?

- आज तक मीन कै बि मंत्री तै इन नि द्याख कि वै तै योजना क बारा क्वी ज्ञान ह्वाओ

-पण?

- हाँ . प्रजातंत्र मा इनी दिख्यांद कि राजनीतिग्य योजना बणान्दन

- हम अधिकारी ही ऊं तै बुलदवां या समझादवां कि या योजना देस कु नि ठीक राली अर या राजनीति क बान ठीक राली

- महोदय ! मंत्री अर हम अधिकार्युं मा क्या फरक च ?

- कै बि योजना क असफलता क अभियोग हम अधिकार्युं पर नि लगद पण मंत्री जी पर असफलता का दाग लगी जांद

- जब कि योजना कार्वानित हमी अधकारी करदवां

- दैट्स अब्स्युलीटली राईट

- सर ! मंत्री जी ऐ गेन अर मंत्री जी परेशान इ ना आतंकित बि दिखेणा छन .

- हाँ वो हमारो विभाग से भुजी खरीदी कि बात पत्रकारों मा लीक ह्व़े ग्याई इलै मंत्री जी आतंकित छन

-पण सर ! यांकी फाइल त आप मा इ रौंदी

- अच्छा चल अब मंत्री जीक आतंक खतम करण मा मदद करे जाऊ\\

Copyright@ Bhishma Kukreti 16/9/2012