गढ़वाळी छिटगा

*******ख़ित्त हैंसि*******

चरि तरफ 
भ्रष्ट लोगोँ तै 
फलदा-फुलदा 
देखि कै  
त्याग,सदाचार 
मर्यादा की बात 
सूणि कै
ऐ जांद 
ख़ित्त हैंसि.


*******शंका******

क्वी भरोसो 
नि छा 
नौनि कब 
ऐ जांद 
सौरास बिटि
भाजि कै 
खैकि मार
य फिर 
चुला पर ही 
कुरमुरी ह्वै जांद.

***********कख च कुर्सी....?*********

उंकी जिकुड़ी 
जु करणी छै 
 सक सक सक
बाच सांस बंद 
आंखि भटगा बंद 
इकहरो सोर
कैका बुन पर कि 
भौत खैरि च औणी 
थ्वड़ीसि देर
धैरी द्या 
कुर्सी मा       
सूणि कै
उंकी जिकुड़ी
धड़कण लगी गे
धक् धक् धक् 
चट्ट खोली आंखि 
इना फुना देखि 
अर पुछदिन 
कख च कुर्सी ..?

       डॉ नरेन्द्र गौनियाल..सर्वाधिकार सुरक्षित...narendragauniyal@gmail.com