उत्तराखंडी ई-पत्रिका की गतिविधियाँ ई-मेल पर

Enter your email address:

Delivered by FeedBurner

उत्तराखंडी ई-पत्रिका

उत्तराखंडी ई-पत्रिका

Wednesday, February 8, 2012

अपण पूठो गू दुसरौ पूठ पर


Satire only
चबोड़ इ चबोड़ मा
                                            अपण पूठो गू दुसरौ  पूठ पर  

( Satire in Garhwali, Satire in Kumauni , Satire in Uttarakhandi and Satire in Himalayan Languges )

                                                     भीष्म कुकरेती
 
                     इख मुंबई मा हमर बिल्डिंग गढवाल दर्शन मा गणपति अर इसाइयूँ  नै साल पर बच्चा अपर बणयाँ प्रोग्राम करदन. बिल्डिंग औ हौल मा बच्चा लोक रिहर्सल करदन. एक दिन सबि अपण  अपण रोल अलग अलग ह्वेका हौल मा रटणा छ्या जां से कि वो अपण डाएलौग ठीक से बोली साकन . अब द्याखो कन अदाकारी होंद धौं !
  कपिल सिब्बल कु  रोल वळ - हाँ! ए.राजा से टू जी स्कैंडल मा चुंगटि बरोबर गलती ह्व़े च पण यू सौब बी.जे.पी. सरकारै गलती च . बी.जे.पी. गबर्मेंट टू जी इ नि लांद त किलै   देशौ  बरखबान इन ढंग से हुंद. बी.जे.पी. वळु तैं  देश मुंगन मोबाइल लाणो बान माफ़ी मंगण चयेंद . ना मोबाइल आन्द अर ना ही बिचारो ए.राजा जी छ्वटि-म्वटि   भुलमार मा  गल्ति करदा
बी.जे.पी. क रवि शंकर प्रसाद -  पत्रकारों ! महाराष्ट्रऔ भूतपूर्व  मुख्यमंत्री अशोक चौहाण  को भ्रष्टाचार अक्षम्य च  किलैकि अशोक चौहाण पर धारा अड़गम -बड़गम   सड़म से   लागू होन्दन. पत्रकार जी ! क्या पुछणा छ्न्वां ..? यदुरप्पा जी !  .. बिलकुल नै ..यदुरप्पा जी पाक साफ़ छन, वून क्या वूंका कै बी रिश्तेदार न  क्वी भ्रस्टाचारी काम नि कार . बी.जे.पी. क मतिमारी, बेवकूफ बणाओ, गल्ति ह्वाओ त जोर से  हल्ला कारो नियमों हिसाब  से यदुरप्पा जी अर वूंका रिश्तेदारूं  पर भ्रष्टाचार को क्वी केस इ नि बणदु
डा. अभिषेक संघवी - पत्रकार लोगो! यो ठीक च महाराष्ट्रऔ भूतपूर्व मुख्यमंत्री अशोक चौहाण  पर धारा अड़गम -बड़गम   क हिसाब से थ्वडा भौत केस बणदो च पण मी रवि शंकर प्रसाद जी तैं याद दिलाण चांदो बल  कोंग्रेस की उलजलूल, तिकड़मि-सिकड़मि, अणभर्वसि नियमों क हिसाब  से अशोक चौहाण से बड़ो इमानदार मुख्यमंत्री  भारत मा पैदा ह्वाई इ नी च.   
भारत कु शिक्षा मंत्री - आज अग्यारा नवम्बर (राष्ट्रीय  शिक्षा दिवस) सन २०१२  को  दिन इन्डियन एज्युकेसन का बान ग्रेट डे  च.  आज यीं बैठक मा भारत का जण्या-मण्या शिक्षा शास्त्री कट्ठा हुयाँ छन. त ख़ुशी क मौक़ा पर  मी महान भारत का   एज्युकेसन मिनिस्टर अनाउंस करदो बल हमारो  शिक्षा विभाग न सन अठारा सौ अट्ठावन (१८५८) का शिक्षा नियम कोड यक्स, यक्स, वाई --वाई, जेड -जेड  मा एक क्रांतिकारी, इंकलाबी तब्दीली कौरी आल. पैल  सन अठारा सौ अट्ठावन (१८५८  शिक्षा नियम कोड यक्स, यक्स, वाई --वाई, जेड -जेड को नाम छौ " क्लर्क बणाणो अणसाळ'. अब हमारि सरकार न ये नियम को नाम  धौरी आल," सीनियर (ठुलो )  क्लर्क बणाणौ निर्माण शाला" ।  हमन सन अठारा सौ अट्ठावन (१८५८) का शिक्षा नियम  " क्लर्क बणाणो अणसाळ'  क भितर एक बि शब्द नि बदलिन जां से कि राज्य अर केन्द्रीय सरकारूं प्रशासनिक  स्टाफ तैं क्वी परेशानी नि ह्वाऊ.  मी तैं पूरो भर्वस बल हमारी सरकारों ये क्रांतिकारी, रिवोल्युसनरी कदम से शिक्षा मा आमूल-चूल  परिवर्तन ह्वालू अर  इंडिया क नाम फोरेन कंट्रीज मा उज्ज्वल होलू.  
भारत कु वित्त मंत्री - पत्रकार  लोगो! आज मी सिरफ़ यू बुलण चांदो बल भारत मा    ये साल ज्वा बि प्रगति ह्वाई वो श्रीमती सोनिया गाँधी जी क दूर दृष्टि अर श्री राहुल गांधी जी क उत्तर प्रदेश मा अथक भ्रमण का बदौलत ह्वाई. अर जो भी मंहगाई बढ़णि च या भारत मा गरीबी बढणि च  वा सौब हमारि विरोधी पार्टीयूँ असहयोग को कारण होणु च .
पर्यावरण मंत्री - भाइयो अर बहिनों ! कु -गाँ - कखौ -गाँ मा विकास इलै नि होणु च किलैकि कु -गाँ - कखौ -गाँ  की जनता हमेशा से ही औद्योगिक विकास क बारा मा इ सुचणि रौंदि   अर एक रति भर बि पर्यावरण बचाणो बारा मा   नि सुचदी .
विकास मंत्री -  भाइयो अर बहिनों ! कु -गाँ - कखौ -गाँ मा विकास इलै नि होणु च किलैकि कु -गाँ - कखौ -गाँ  की जनता हमेशा ही पर्यावरण बचाणो बारा मा इ सुचणि रौंदि   अर एक रति भर बि औद्योगिक विकास क बारा नि सुचदी  
कृषि मंत्री -   उस्मानाबाद  का दगड्यों  (वोटर्स)  ! उस्मानाबाद महाराष्ट्र मा सबसे पिछड़ा क्षेत्र च. जब तलक उस्मानाबाद मा कृषि विकास नि होलू इखाक विकास असम्भव च. पण उस्मानाबाद मा  कृषि विकास इलै नि होणु च किलैकि खेल मंत्रालय न अबि तलक मोडर्न क्रिकेट ग्राउंड की अनुमति नि दे . जैदिन खेल मंत्रालय उस्मानाबाद मा मोडर्न क्रिकेट ग्राउंड की अनुमति दे द्यालों उस्मानाबाद जिलौ  भाग खुलि जाला .
विज्ञान अर तकनीक मंत्री - हम अब जून (चाँद) मा जाणै तैयारी करणा छंवां . मी प्रधान मंत्री को अहसान मंद छौं बल जौन शिक्षा मंत्रालयौ  अद्धा बजट काटिक ' मिसन  टु मून '  योजना तैं दे
एक राज्यौ मुख्य मंत्री - चीफ सेक्रेटरी जी !   क्या बुलणा छंवां ? बल  मिनिस्टरूं अर विधायकुं बंगला, गाड़ी-घ्वाड़ा , बिजली-पाणी, यात्रा भत्ता आदि क बजट छैइ मैना मा खतम ह्व़े गे? त इन कारो कि  ' अति गरीबी हटाओ योजना' क बजट कम कौरिक विधायकुं अर मन्त्र्युं मेंटेनेन्स बजट बढ़े द्याओ.
बुड्या गूणी  छ्वटा  छ्वटा गूणयूँ तैं सिखाणो छौ- हम गूणि यूँ तैं  मनिखों बिटेन सीख लीण चयेंद कि कन अपण पूठो गू दसरौ  पूठ  पर घुसण चयेंद जां से अपण पूठ लोगूँ समणि साफ़ दिखयाउ !   
 
 Satire in Garhwali, Satire in Kumauni , Satire in Uttarakhandi and Satire in Himalayan Languges to be continued...
Copyright@ Bhishm Kukreti  

No comments:

Post a Comment

आपका बहुत बहुत धन्यवाद
Thanks for your comments