जौन नि पस्सारी कबि हथ

सरय साल
बनै जु पुनगड़ी पटली
ये बस्गाल
सब्य बगिगैन |

ड़ाला ब्वाटों
दे खाद पाणि
लगीं फल
त सैडीगैन |

छाई छ जु कूड़ी
चून्दों क डौर से
वूंकी पाल्युन पर
तिडवाल पोडीगैन |

नोन्याल जु गै छ
पढ़णखु
वून्का बस्ता
घौर पोछिगैन |

अन्न पाणी
दवा - दारु
पौंछि नि सकदू
सड़की रयाड़
बनीगैन |

असमानमा
रिन्ग्दा बैरा गरूढ़का
आन्खाबी
फूटीगैन |

जौन नि पस्सारी
कबि हथ
कैका अग्ने
वी आज
मोहताज़
ह्वेगैन |

विजय मधुर